QueeRadar 2024-cü il üçün hazırladığı illik media monitorinqində Azərbaycan, Ermənistan və Gürcüstandan 1141-dən çox materialı təhlil edərək regionda kuir insanların mediada necə təqdim olunduğunu üzə çıxarıb. Hesabat göstərir ki, Cənubi Qafqaz mediası hələ də kuir həyatları manipulyasiya etmək, siyasi ritorika qurmaq və ya sensasiya yaratmaq üçün alət kimi istifadə edir.
Azərbaycanda LGBTİQ+ mövzulu xəbərlərin 85%-i xarici hadisələrə həsr olunub və kuirlik Qərbdən “idxal edilmiş siyasi gündəm” kimi çərçivələnib. 691 xəbərdən yalnız 7-si insan hüquqları prizmasından yazılıb.
Ermənistanda media azadlığı artsa da, kuir mövzular hələ də kənarda qalır; trans qadınların görünürlüğü yüksəlsə də, təqdimatlar çox vaxt səthi və sensasiyaya yönəlib. Rusdilli media narrativlərinin təsiri güclü olaraq qalır.
Gürcüstanda isə repressiv “Ailə dəyərləri” qanunu həm kuir simvolları, həm də mediada kuir reprezentasiyasını faktiki olaraq qadağan edib. Hökumətyönlü KİV-lər anti-kuir şüarları təkrarlayıb, trans model Kesaria Abramidzenin qətli isə siyasi kontekstdən çıxarılaraq işıqlandırılıb.
Hesabat mediada qərəz, dilin istifadəsi, senzura, siyasi manipulyasiya və təhlükəli narrativlərin necə yayıldığına dair detallı vizual və analitik məlumatlar təqdim edir.
QueeRadar bildirir: Media yalnız xəbəri izah etmir — kimin insan kimi görünəcəyini, kimin susdurulacağını müəyyənləşdirir.
