Öz seksuallığını yaşamış, şəxsi çətinliklərdən keçmiş, özünü qəbul edib ətrafın rəddini hiss etmiş biri olaraq – gəlin açıq və aydın səbəblərlə baxaq: kuir seks digər bütün təcrübələrdən daha dərin və formalaşdırıcıdır.
Belə bir başlıq bəziləri üçün provokativ görünə bilər, amma gəlin açıq danışaq: kuir sekslə digər seks təcrübələrini müqayisə etmək üçün real əsaslarımız var.
Əvvəlcə bunu deyək – hər bir seks forması özlüyündə gözəldir. Hər bir insan zamanla öz ehtiyac və arzularına uyğun seksual praktikalara yaxınlaşa bilər. Amma kuir seksin bəzi açıq üstünlükləri var. Və bu üstünlüklər nə sadəcə daha sərbəst davranışla, nə də “bir gecəlik” tanışlıqlarla bağlıdır. Söhbət prosesə olan yanaşmadan, özünüqavramadan və intimliyə münasibətdən gedir.
“Yaxşı seks” nədir?
Sənin üçün “yaxşı seks” nə deməkdir? Əksər insan bunu dərhal bilmir. Bu anlayışa gəlib çatmaq üçün real təcrübə, istək və ehtiyaclarını kəşf etməyə sərf olunan zaman, həmçinin öz seksuallığın üzərində dərin düşünmək lazımdır.
Mən isə bütün yaşadıqlarımdan sonra tam əminliklə deyə bilərəm: kuir seks — seksuallığı kəşf etmək üçün ən güclü başlanğıcdır.
Qarşıda sual yaranırsa, bəli, mən burada yalnız gey seksdən danışmıram. Lezbiyen, biseksual, qeyri-binar, trans şəxslərlə/seksual təcrübələr – bunların hamısı bu yazıda “kuir seks” anlayışı altında ümumiləşdirilir.
Təkrarı olmayan bir təcrübə
İnsan kuir olduğunu dərk etməyə başladıqda və seksuallığının bu tərəfini kəşf etməyə girdikdə – bir müddətlik hər şey dəyişir. Digər təcrübələr əvvəlki kimi maraqlı gəlmir, çünki sən öz içinə doğru ilk dəfə bu qədər açıq baxırsan.
LGBTQ+ olaraq biz çox erkən yaşlarımızdan etibarən elə bir prosesdən keçirik ki, bu, heteronormativ mədəniyyətin içində böyüyən biri üçün heç vaxt tam anlaşılan olmur. Seksual arzularımız formalaşmağa başlayan ilk dövrlərdən başlayaraq, içimizdəki hissləri qəbul etməyə çalışırıq – elə hisslər ki, cəmiyyətin böyük hissəsi onları ya “nəsə səhv” hesab edir, ya da tamamilə qadağan etməyə çalışır.
Bizə daha çox psixoloji baryer aşmaq, daxili, sosial, mədəni, hətta milli və siyasi seksuallıq tabularını qırmaq düşür. Heteroseksual təcrübəyə sahib bir insan üçün bu maneələrin heç biri mövcud olmaya bilər.
Tanınmış ssenarilər:
- Seksuallığından əmin olmayan yeniyetmə oğlan başqa bir oğlanla ilk öpüşdən qorxur – çünki düşünür ki, bu onun “tamamilə gey” olduğunu sübut edəcək.
- Dindar ailədə böyüyən utancaq bir qız sinif yoldaşına qarşı hiss etdiyi seksual maraqdan qorxur – çünki illərlə eşitdiyi “günah” fikirləri beynində dolaşır.
- Öz genderini dərk edən, amma keçidə başlamamış trans yeniyetmə, qonşu sinifdəki qızla yaxınlıq istədikdə necə davranacağını, nəyi necə izah edəcəyini bilmir.
Bütün bu təcrübələri çox vaxt təkbaşına yaşayırıq. Amma bu prosesdən keçə bilənlər – gələcəkdə öz seksuallığını daha dərindən anlayır, spektrlərini tanıyır və “yaxşı seks”in nə olduğunu həm özləri, həm də tərəfdaşları üçün daha rahat ifadə edə bilir.
Daxili azadlıq
Bu iç mübarizə — bəli, bəzən çox çətin və tükəndirici olsa da — sonda bizə inanılmaz güclü bir şey verir: özünü tam şəkildə qəbul etmə bacarığı.
Bu qəbul bizə dünyaya daha açıq və ayıq gözlərlə baxmaq imkanı verir. Kuir bir insan kimi yaşadığımız həyat təcrübəsi, heteronormativ həyat tərzindən daha çox düşünmə, analiz etmə və fərqli spektrləri anlamağı tələb edir. Bu isə bizi daha şüurlu, daha həssas və daha azad edir.
Məhz bu məqamda məqalənin başlığında dediyimiz fikrə çatırıq: kuir seks daha yaxşıdır, çünki o, “normal” sayılmayan istəklərini və spektrlərini qəbul etdikdən sonra gəlir. Və bu, səni özünə qarşı daha dürüst, partnyoruna qarşı daha açıq və seksuallığa qarşı daha yaradıcı edir.
Qəbul və yenidən doğuluş
Öz istəklərindən utanmadığın bir məqam gəlir. Artıq stereotiplərdən ibarət köhnə qalıqları içinə yığmırsan. Açıq danışırsan, səmimi olursan, və seks sənin üçün sadəcə bioloji ehtiyac deyil – bu, emosional yaxınlıq, özünüifadə və güvən üzərində qurulan bir təcrübəyə çevrilir.
Heteronormativ cütlüklərin bir-birini istəməsi və birbaşa prosesə keçməsi çox zaman yetərli olur. Amma biz – kuir insanlar – özümüzlə və ətrafla apardığımız dialoqlar, daxili qırılmalar və dəyərləri yenidən qurma mərhələlərindən keçirik. Bu isə bizə seksuallığa çox daha şüurlu və fərdi yanaşmaq imkanı verir.
Axtarış və cəsarət
Bizi fərqli edən budur: biz qorxmuruq. Yeni şeyləri sınamaqdan, hiss etdiklərimizi ifadə etməkdən və öz bədənimizi yenidən kəşf etməkdən çəkinmirik. Biz hər şeyi əvvəldən qurmalı olmuşuq – və məhz bu səbəbdən daha güclüyük.
Sənə “bu olmaz”, “bu günahdır”, “bu anormaldır” deyildiyi bir dünyada — sən yenidən öz “mən”ini qurursan. Stereotipləri dağıdırsan. Seksuallığını azad edirsən. Bu azadlıq bəziləri üçün qorxulu görünə bilər, amma bizim üçün bu — həyatdır.
Sev özünü – hər halınla
Əgər dominant mədəniyyət nümayəndələri efirdə öz monoloqları ilə istədikləri kimi cəsarətli açıqlamalar edə bilirlərsə, biz – bu kiçik, amma çox güclü LGBTQ+ icması da – öz seksuallığımızı, öz təcrübəmizi və öz gücümüzü eyni dərəcədə yüksəyə qaldıra bilərik.
Balans yaratmaq üçün, bəlkə də sadəcə nəfəs almaq üçün belə olsa – özümüzü sevmək haqqımızdır. Hər halımızla. Hər kimliyimizlə. Hər arzumuzla.
Mənbə: Parni+
